காங்கிரசை விமர்சித்து தன் வேலையைக் காட்டிய வைகோ??!!

வைகோவின் மாநிலங்கள் அவை பேச்சு பலரது கவனத்தையும் ஈர்த்தது.

காஷ்மீரை துண்டாடிய பாஜகவை கடுமையாக தாக்கிய வைகோ காங்கிரசை அதிகம் தாக்கியதுதான் விமர்சனத்துக்கு உள்ளானது.

பேசியதில் தவறு ஒன்றும் இல்லை. காங்கிரஸ் செய்ததைத்தான் வைகோ சுட்டிக்காட்டினர். இப்போது அவர்கள் ஆட்சியில் இல்லை. ஆட்சியில் இருக்கும் பாஜக தனது கோர முகத்தை காட்டும்போது அதை மட்டும் கண்டிக்காமல் காங்கிரசையும் விமர்சிப்பது இருவரையும் சம தூரத்தில் வைப்பது போன்றது.

காங்கிரஸ் திமுக கூட்டணியில் இருக்கிறது. இது அவர்களுக்குள் புகைச்சலை ஏற்படுத்தாதா?

பாஜகவை திருப்திபடுத்த வைகோ முயற்சிக்கிறார் என்ற பழி வராதா?

இலங்கை தமிழர்களை பழி வாங்கிய காங்கிரஸ் இதுவரை அதற்கு பிராயச்சித்தம் செய்ய முன்வரவில்லை.

இந்திராகாந்தியை கொலைசெய்த சீக்கியர்களை மன்னித்து மன் மோகன் சிங்கை கொண்டாடுகிற காங்கிரஸ் இலங்கையில் தமிழர்கள் சம உரிமை பெறுவதற்கு என்ன முயற்சி செய்திருக்கிறது? ஏழு பேர் விடுதலையிலும் காங்கிரஸ் நியாயம் செய்யவில்லை.

ஒருவேளை அந்த கோபம்தான் வைகோவை காங்கிரசுக்கு எதிராக பேச வைத்ததோ என்னவோ?

எப்படி இருந்தாலும் பாஜக எதிரணியில் எழுந்துள்ள புகைச்சல் பாஜகவை மகிழ்ச்சி அடையத்தான் செய்யும்.

கேஎஸ் அழகிரியும் ஈவிகேஎஸ் இளங்கோவனும் வைகோவை விமர்சிக்க வைகோ சூடாக பதில் கொடுக்க இது எங்கோ கொண்டு போய் விடுமோ என்ற அச்சம் தொண்டர்களிடையே ஏற்பட்டுள்ளது.

திமுக  கூட்டணி முறியும் என்பதற்கு அறிகுறியாக இதை நிச்சயம் அவர்கள் எடுத்துக் கொள்வார்கள்.

எதிர்வரும் தமிழக சட்ட மன்ற தேர்தலுக்கு வியூகம் வகுப்பதில் இது நிச்சயம் சிக்கலை ஏற்படுத்தும்.

வைகோ கொஞ்சம் நிதானிப்பது நல்லது.