பொதுமேடை

பிரமிக்க வைக்கிறது ஜக்கி வாசுதேவ் தமிழகத்தில் கண்ட அசுர வளர்ச்சி.

சாமியார்களின் வளர்ச்சியும் வீழ்ச்சியும் திடீர் திடீர் எனத்தான்      தோன்றும்.

03.09.1957 ல் மைசூரில் ஒரு தெலுகு பேசும் தம்பதிக்கு பிறந்த ஜகதீஷ் ஆங்கில இலக்கியத்தில் பட்டம் பெற்றார். அதுதான் அவரது மூலதனம்.    இன்று சரளமாக ஆங்கிலத்தில் அவர் உரை நிகழ்த்தும் அழகு அவருக்கு தனி மரியாதையை சர்வ தேச ரீதியில் பெற்று தந்திருக்கிறது.

தனது 25 வயதில் 1982ல் சாமுண்டி மலையில்யோகா பயிற்சி செய்தவர்    1883ல் முதல் யோகா வகுப்புகள் எடுக்க தொடங்குகிறார்.

1993 ஈஷா பௌண்டேஷனை கோவையில் தோற்றுவிக்கிறார்.

12.10.1997 ல் இந்தியன் எக்ஸ்பிரஸ் பத்திரிகை ஒரு சாமியார் மீது கொலை குற்றச்சாட்டு என்று தலைப்பிட்டு செய்தி வெளியிட்டது. அது ஜக்கி வாசுதேவ் தனது மனைவி விஜியை கொலை செய்து விட்டார் என்று அவரது மாமனார் காவல் துறையில் புகார் கொடுத்ததுதான். மனைவி இறைவனில் ஐக்கியமாகி விட்டார் என்று ஜக்கி வாசுதேவ் வாக்குமூலம் கொடுத்தார்.  வழக்கு அவ்வளவுதான்.

2017ல் வெள்ளிங்கிரி மலையில் 112 அடி ஆதியோகி சிலையை பிரதமர் நரேந்திர மோடி கையால் திறந்து வைத்த நிகழ்ச்சி ஜக்கி வாசுதேவின் செல்வாக்கை உலகிற்கு பறைசாற்றியது.

ஈஷா யோகமைய்யம் மத சார்பற்ற வருவாய் ஈட்டும் நிறுவனமாக இல்லாமல் செயல்படுகிறது என்று விளம்பரப் படுத்தப் படுகிறது.

ஆனால் உண்மையில் இந்து மத சாயல் கொண்டும் பின்னணியில் இந்து மத சக்திகள் தான் இயக்கு கின்றன என்று குற்றச்சாட்டு இருப்பது உண்மை.

இன்னர் இன்ஜினியரிங், இன்க்ளுசிவ் எகானமி என்றெல்லாம் சத்குரு ஆற்றும் உரைகள் பாமரர் களுக்கு அல்ல. படித்த மேல்தட்டு மக்களுக்கானது. அவர்கள்தான் ஈஷா மையத்தின் காவலர்கள். படித்த இளைஞர்கள் அவரிடம் ஐக்கியமாவதை விரும்புவதன் காரணம் இன்னும் பலருக்கு விளங்கவில்லை.

இயல்பாகவே மனிதர்களிடம் இருக்கும் நல்ல குணங்களை வாசுதேவ் தட்டி எழுப்புகிறார்.

ஏராளமான புத்தகங்கள் உலக முழுதும் ஈஷா மையம் சார்பில் விற்கப் படுகின்றன. பல கோடிப்பேரை மிகச் சாதாரணமாக அவரால் ஈர்க்க முடிந்திருக்கிறது.

தங்கள் பிள்ளைகளை ஜக்கி வாசுதேவ் மயக்கி வைத்திருப்பதாகவும் மீட்டுத் தரக் கோரியும் புகார்கள் வந்தன. பின்னர் அவை மறைந்தன.

ரவிசங்கர், வாசுதேவ் போன்றவர்கள் மிக சுலபமாக வர்த்தக நிறுவனங்களை தங்கள் வயமாக்கிக் கொள்கிறார்கள். மேல்தட்டு  மக்களுக்கும் இவர்களைத்தான் பிடித்திருக்கிறது.

பாமரர்கள் தான் பாவம் உள்ளூர் சாமியார்களோடு திருப்தி அடைய வேண்டி இருக்கிறது.

பத்மவிபூஷன் விருது பெறும் அளவு மத்திய அரசு ஜக்கி வாசுதேவுக்கு அங்கீகாரம் அளித்திருக்கிறது. கலைஞரும் கூட மையத்தில் மரக்கன்று நட்டு தனது ஆதரவை வெளிப் படுத்தி இருக்கிறார்.

அதிகார மையங்கள் இத்தகைய குருமார்களுக்கு வேண்டியவர் களாகத்தான் இருக்கிறார்கள். மன்னர் காலத்து வழக்கம் மக்களாட்சி யிலும் தொடர்கிறது.

காவி தவிர்த்து, மத சின்னங்கள் தவிர்த்து, வித்தியாசமான உடை அணிந்து ஜக்கி  வாசுதேவ் தனித்துத்தான் காணப் படுகிறார்.

சிவராத்திரி அன்று அவரது உரை மிகச்சிறப்பானது. ஆனால் அது திருமூலரும், வள்ளலாரும், வள்ளுவரும் சொன்னதன் ஆங்கில ஆக்கம் என்பதை யாரும் மறுக்க முடியாது.

பார்ப்பனீயம் அதன் செல்வாக்கு பற்றி சத்குரு வெளிப்படையாக பேசுவதில்லை. அங்கேதான் சந்தேகம் வருகிறது.

ஒரே ஒரு வேண்டுகோள்; சத்குரு அவர்களே பாமரர் பக்கமும் கொஞ்சம் கவனம் செலுத்துங்களேன். ஏனென்றால் அப்போதுதான் நீங்கள் சத்குருவா தமிழர் மத்தியில் நிலைகொண்டிருக்கும் சுயமரியாதை உணர்வுக்கு சத்துருவா என்பது தெரியும்.

1809 ல் பிறந்து  1833 ல் புதுப்பிறவி எடுத்து 1851ல் மறைந்த அய்யா வைகுண்டர் கண்ட வழி தனி மதமே?!

அவரை இந்து மதம் என்ற பார்ப்பனீய மதத்தில் அடக்குவது அவருக்கு செய்யும் துரோகம். தன் வாழ்நாளில் வர்ண தர்மத்தை ஏற்காதவர் அவர் .

ஏறத்தாழ வடலூர் வள்ளலாரின் சம காலத்தவர் அய்யா வைகுண்டர்.

தமிழ் நாட்டில் வள்ளலார் செய்த புரட்சியை அய்யா வைகுண்டர் கேரள மாநிலத்தில் செய்தார்.   அவரது பிறந்த கன்னியாகுமரி மாவட்டம் அப்போது கேரள மன்னன் சுவாதி திருநாள் ஆட்சியில்  இருந்தது.

சம்பூர்ணதேவன் என்கிற முத்துக்குட்டி க்கு பிறந்தபோது தந்தை பொன்னு நாடார் இட்ட பெயர் முடிசூடும்பெருமாள். அப்படி எல்லாம் பெயர் வைத்துக்கொள்ள அப்போது நாடார் இனத்தவருக்கு உரிமை இல்லை.  புகார் செய்யப்பட்டதால் பெயரை முத்துக்குட்டி என்று மாற்றிகொண்டார்கள்.

அவர் முன்பே திருமணம் ஆன திருமலம்பாளுடன் வாழ்ந்து ஒரு பிள்ளையை பெற்று எடுத்ததாகவும் வரலாறு.

பின்னர் தனது 24 வது வயதில் திருச்செந்தூர் கோவிலில் வழிபட சென்று கடலில் காணாமல் போய் மூன்றாவது நாளில் ஸ்ரீமன் நாராயணனின் மறு அவதாரமாக மீண்டு வந்ததை தான் அவரது அவதார தினமாக பக்தர்கள் கொண்டாடுகிறார்கள். அதாவது 1833 ம் ஆண்டு முதல் அவர் வைகுண்டம் திரும்பி அடக்கமான 1851 ம் ஆண்டு வரையிலான பதினெட்டு ஆண்டுகளில்  அவர் ஆற்றிய தெய்வீகப் பணி தான் அவரை  அய்யாவழி மரபை உருவாக்கிய மகானாக உயர்த்தி வைத்திருக்கிறது.

இடையில் அவரது புகழ் பெருகத் தொடங்கியவுடன் புகார்களும் சென்று மன்னன் சுவாதி திருநாள் வைகுண்டரை சிறையில்  110  நாள் அடைத்து வைத்த கொடுமையும் நடந்தது.

சிறையில் இருந்து  மீண்டவர் சுவாமிதோப்பு பதியில் தனது பணியை தொடர்ந்து செய்து அரிய புகழ் பெற்று தனி வழியை படைத்து மறைந்தார்.

நாடார் பெருமக்களுக்கு அந்த காலத்தில் அரசு செய்து வந்த அடக்கு முறைகளால் மனம் வெந்து   சுயமரியாதையை யும் சமூக அந்தஸ்தையும் அச்சம் அகற்றலையும் போதித்த புரட்சியாளார் அவர்.

பிசாசு என்பதெல்லாம் இல்லை, நோய் என்பது இல்லை  வலி என்பது இல்லை , வரி என்பதும் இல்லை, எனவே துணிவுடன் வாழுங்கள் என்று போதித்த பின்னணியில் அந்த காலத்து அரசியல் இருக்கிறது.

அன்று அவரது சீடர்களாக ஐந்து  பேர் இருந்திருக்கிறார்கள் .   ஆனால் அவரது புகழ் தமிழகம் முழுதும் பரவாமல் இருந்ததுதான் வருத்தத்திற்கு உரியது.

பெரும்பாலும் அவரது பக்தர்கள் நாடார் சமூகத்தில் இருப்பதும் அந்த அரசியல் பின்னணியில்தான்.

எந்த சனாதனம் கற்பித்த நால்வருணத்தை ஏற்க மறுத்தாரோ அதே சனாதனம் அவரை தன்னுள் அடக்கிக் கொண்டதுதான் வரலாற்றின்  சோகம். 

அவரின் பக்தர்களும் தெரிந்தோ தெரியாமலோ சனாதனத்துக்கு வால் பிடிக்கும் வேலையை செய்து கொண்டிருக்கிறார்கள்.

இன்று சுவாமிதோப்பு பதி  வேரூன்றி விட்டது.  எனவே  சனாதனம் சுவாகா செய்யப் பார்க்கிறது.  ஆம்.  இந்து அறநிலையத்துறை சுவாமிதோப்பு பதியை ஏற்கச் செய்ய சூழ்ச்சிகள் நடை பெறுகின்றன.

அரசே ஆலயத்தை விட்டு வெளியேறு என்று வெற்று கூச்சல் இடும் சனாதனிகள் சுவாமிதோப்பை அறநிலையத்துறை ஏற்பதை  வரவேற்கிறார்கள்.  ஏனென்றால் அங்கே பார்ப்பனீயம் கோலோச்ச வில்லை.   அதை விட்டு வைப்பதா என்ற ஆதங்கம்.

சுவாமிதோப்பு  பதி தனது தனித்தன்மையை காத்துக் கொள்ள வேண்டும்.  அதற்கு தமிழர்கள் துணை நிற்க வேண்டும்.

‘அகில திரட்டு ‘  தமிழர்களின் ஆன்மிக வழிகாட்டு நூலாக வேண்டும்.

அங்கே நடை முறையில் உள்ள சம்பிரதாயங்கள் முக்கியம் அல்ல.   அய்யா வைகுண்டர் போதித்த கருத்துக்களின் சாரம்தான் முக்கியம்.  அதை உள்வாங்கிக் கொண்டு தமிழ் சமுதாயம் மேன்மையுற வேண்டும்.

அதற்கு முதல் படியாக  அய்யா வைகுண்டர் வழியை தனி மதமாக அங்கீகரிக்க மத்திய மாநில அரசுகள் முன்வரவேண்டும்.   அதற்கு அய்யா வழி பக்தர்கள் போராட வேண்டும்.   எல்லா தமிழ் மக்களும் அதற்கு துணை நிற்க வேண்டும்.

தமிழர் சமயங்களை ஒருங்கிணைக்க முடியாதா ?    முடியும் என்பதை நிரூபிப்போம்.!    அதுவே சனாதனத்தை முறியடிக்க ஒரே வழி!!!