பொதுமேடை

பார ‘தீய‘ ஜனதா கட்சி- சரியான பெயர்தான்  !

மோடிக்கு தேர்தல் பொறுப்பாளர் பதவி கொடுத்ததும் ,அதை ஆட்சேபித்து அத்வானி மூன்றாவது முறையாக பதவிகளை ராஜினாமா செய்ததும் ஆர் எஸ் எஸ் அமைப்பின் தலைவர் தலையிட்டதும் ராஜினாமாவை வாபஸ் பெற்றதும் ஏதோ ஓர் நாடகம் போல் தோன்றினாலும் பல உண்மைகளை இந்த நிகழ்வுகள் வெளிச்சத்துக்கு கொண்டு வந்து விட்டன

பா ஜ க என்ற அரசியல் கட்சி ஆர் எஸ் எஸ் என்ற அமைப்பின் கட்டுப் பாட்டில்தான் இயங்குகிறது.

சுஷ்மா ஸ்வராஜ் ராஜ பக்சேவிடம் விலை போய் விட்டார் என்பது அவர் இலங்கை போய் வந்து அங்கு உள்ள தமிழர்கள் தனி நாடு கேட்க வில்லை என்று சென்னையில் பேசிய போது வெளிப்பட்டது.  

இப்போது ரவி சங்கர் பிரசாத் இலங்கை போய் வந்து சிங்கள ஆட்சிக்கு சான்றிதழ் கொடுக்கும் விதமாக நிவாரண வேலைகள் நன்றாக நடக்கின்றன என்று பேசினார். தன்னுடன் தமிழகத்திலிருந்து யாரையாவது அழைத்துக் கொண்டு போயிருந்தாலாவது அவரது பேச்சுக்கு பொருள் இருந்திருக்கும். ஆக பா. ஜ. க. தலைமை சிங்கள ஆட்சியாளர்களின் ஊதுகுழல் ஆகி விட்டார்கள்.

அத்வானியின் இறங்கு முகத்திற்கும் ஆர் எஸ் எஸ் தான் காரணம்.

தனக்குப் பயன் படுகிற வரைதான் ஆர் எஸ் எஸ் எவரையும் தாங்கிப் பிடிக்கும்.

பயன்படாத எவரையும் தூக்கி எறிய அது தயங்காது.

கட்சியின் செயல்படும் தன்மையில்தான் தனக்கு ஆட்சேபணை என்ற அத்வானியின் கருத்துக்கு எந்த விளக்கமான பதிலையும்  அவர்களால் கொடுக்க முடியவில்லை.

வழிகாட்ட மட்டும் அத்வானி வேண்டும். தலைமையேற்க அல்ல என்பதை மிக உறுதியாக சங்கம் தெரிவித்து விட்டது.

வெற்றியைக் கொடுப்பார் என்ற நம்பிக்கைதான் இப்போது மோடியை முன்னிறுத்துகிறது.    அவரால் அது முடியாது என்று எப்போது உணருகிரார்களோ அப்போது அவரும் தூக்கி எறியப் பட்டுவிடுவார். 

அதற்கெல்லாம் விதி விலக்கு பெரும் வகுப்பில் அவர் பிறக்க வில்லையே.

தலைவர்கள் சுயநலமிகளாகிவிட்டர்கள்  என்ற அத்வானியின் குற்றச்சாட்டு அப்படியே இருக்கிறது.  அதாவது பா. ஜ. க. என்பது இனிமேல் பாரதத்திற்கு ‘தீய ‘கட்சிதான் . அதாவது  பாரதீய என்றால் பாரம் என்ற சுமையையம் ‘ தீய’ என்ற தீமையையும் மட்டுமே தரக் கூடிய கட்சி.

நல்ல பேர் வைத்தார்கள்.

வி.வைத்தியலிங்கம் (Vaithiyalingam.V)

தமிழில் வாதாடக் கூடாது என்று தமிழ் அறிந்த நீதிபதி மாண்புமிகு மணிக்குமார் அவர்கள் தீர்ப்பளித் திருக்கிறார்.

அரசியல் சட்ட பிரிவு  348 ( 2 ) ன் படி மாநில ஆளுநர் குடியரசுத் தலைவரின் அனுமதியோடு தமிழை உயர் நீதி மன்ற மொழியாக பயன்படுத்த அங்கீகாரம் அளிக்காமல் இருப்பதுதான் காரணம்.

தமிழக சட்ட மன்றத்தில் இதற்கான தீர்மானம் நிறைவேற்றப் பட்டும் கூட ஆளுநரின் செயல் இன்மைக்கு யார் காரணம்?

மத்திய அரசுதான் முழு முதல் காரணம். மாநில அரசின் முடிவை ஆளுநரும் மத்திய அரசின் முடிவை குடியரசுத் தலைவரும் அமுல் படுத்தக் கடமைப் பட்டவர்கள்.

இதற்கான ஆலோசனையை மத்திய அரசு உச்ச நீதி மன்றத்தில் கேட்ட போது அப்போதைய தலைமை நீதிபதி அப்படி செய்வது உகந்தது அல்ல என்று கருத்து தெரிவித்ததை சாக்காக வைத்து மத்திய அரசு காலங் கடத்தி வருகிறது . 

அப்படி கருத்து கேட்க வேண்டிய அவசியமே இல்லை.    வடமாநிலங்களில் சிலவற்றில் இந்தி மொழி , அதற்கான அனுமதியை ஆளுநரிடம் பெற்று , உயர் நீதிமன்றங்களில் பயன் படுத்த பட்டு வருகிறது.

1961  முதல் ஆளுநர் அனுமதி பெறாமலும்    1969 முதல் அனுமதி பெற்றும் உ. பி . இல் இந்தி மொழி உயர் நீதி மன்ற மொழியாக பயன்பாட்டில் இருக்கிறது.    ஆனால் அதற்குப் பிறகு கூட இதர மாநிலங்கள் தங்களுக்கும் தங்கள் மாநில மொழியை உயர் நீதி  மன்ற மொழியாக பயன் படுத்த அனுமதி வேண்டும் என்று போராட முன் வரவில்லை. ஆங்கிலமே போதும் என்று இருந்து விட்டார்கள்.  விழிப்புணர்வு இல்லை என்று மட்டும்தான் சொல்ல முடியும்.    விருப்பம் இல்லை என்று சொல்ல முடியாது.

இந்தி பேசும் மக்கள் தங்கள் மாநிலங்களில் உயர் நீதி மன்றங்களில் இந்தியை பயன் படுத்த முடியும் என்றால் இந்தி பேசாத மாநில மக்கள் தங்கள் மாநிலங்களில் தங்கள் தாய் மொழியை பயன் படுத்த வாய்ப்பு மறுக்கப் படுவது எப்படி நியாயமாகும்?

அதுவும் அரசியல் சட்டத்தில் அதற்கான பிரிவு இருக்கும்போது அதை மறுப்பது அநீதி?

மத்திய அரசில் இருக்கும் தமிழ் அமைச்சர்கள் இதற்கான முயற்சியில் இறங்கி இருக்கிறார்களா?   அவர்களது பங்கு என்ன?

இப்போதும் தமிழ் நீதிபதிகள் அவ்வப்போது தமிழில்தான் கேள்விகளையும் கருத்துக்களையும் நீதிமன்றத்தில் வைக்கிறார்கள்.  அதையே வழக்கறிஞர்கள் வாதத்தில் செய்தால் என்ன தவறு.?  

அனுமதி பெரும் வரை வேண்டுமென்றால் தீர்ப்புகளை ஆங்கிலத்தில் எழுதி விட்டுப் போங்கள்.   வாதிட அனுமதிப்பதில் உங்களுக்கு என்ன பிரச்னை?

ஒரு நாட்டின் குடிமகன் தன் தாய் மொழியில் உச்சநீதி மன்றம் வரையிலும் வழக்காட முடிய வேண்டும்.    செப்பு மொழி பதிநெட்டுடையாள் என்று பெருமை பேசிக்கொண்டால் மட்டும் போதாது. தெலுங்கு பேசுவோருக்கு தமிழ் ,இந்தி, ஆங்கிலம் உள்ளிட்ட அனைத்து மொழிகளும் பிற மொழிதான்.   அதேதான் எல்லா மொழியினருக்கும்.

ஆங்கிலம் தெரிந்தால் தான் உலகம் சுற்ற முடியும் என்றால் சுற்ற வேண்டியவர்கள் கற்றுக் கொள்வார்கள்.  மற்றவர்களை கட்டாயப் படுத்த வேண்டியதில்லையே.    அதேபோல் இந்தி கற்றால்தான் வேலை கிடைக்கும் என்றால் தேவை உள்ளவர்கள் கற்றுக் கொள்வார்கள்.   இப்போது மும்பையில் உள்ளவர்கள் மராட்டி அல்லது இந்தி பேசுகிறார்கள். டெல்லியில் உள்ளவர்கள் இந்தி பேசுகிறார்கள். கொல்கத்தாவில் உள்ளவர்கள் வங்காளி பேசுகிறார்கள்.   தேவை உள்ளவர்கள் கற்றுக் கொள்வார்கள்.   யாரையும் கட்டாயப் படுத்த வேண்டிய அவசியம் என்ன வந்தது ? 

இந்தி பிரசார சபை போதும் இந்தி கற்றுக் கொள்ள.    தேவை உள்ளவர்கள் அங்கு போகட்டும்.   நேரடியாகவோ மறைமுகமாகவோ திணிக்கும்போதுதான் பிரச்னை வருகிறது.  எதன் காரணமாகவும் மாநில மொழிகளின் முக்கியத்துவத்தை  குறைக்கும் முயற்சிகளை அனுமதிக்க முடியாது.

எவரையும் இரண்டாந்தரக் குடிமக்களாக பாவிக்கும் முயற்சியில் யார் இறங்கினாலும் அவர்களுக்கு இந்திய ஒற்றுமையில் அக்கறை இல்லை என்றுதான் பொருள்.

முதலில் உயர் நீதி மன்றங்களில் மாநில மொழிகள் வரட்டும்.   பின்பு உச்ச நீதிமன்றத்தில் என்ன செய்யலாம் என்பது பற்றி விவாதிக்கலாம்.

அடிப்படையில் , அரசு ,சட்ட மன்ற நாடாளுமன்றங்கள், நீதிமன்றங்கள் எல்லாமே மக்களுக்காகத்தான்.   ஏதாவது மாற்றம் செய்ய வேண்டும் என்றால் அவைகளில்தான் மாற்றங்களை செய்ய வேண்டுமே தவிர மக்கள் தங்களை மாற்றிக் கொள்ளுமாறு கோர யாருக்கும் உரிமை இல்லை.

உச்சநீதி மன்றத்திலும் அனைத்து இந்திய மொழிகளிலும் வாதிட முடியும் என்ற நிலை வர வேண்டும்.  அதுதான் இந்தியா  ஒன்று என்பதன் அடையாளம்.


வி.வைத்தியலிங்கம் (Vaithiyalingam.V)

தமிழர்களின் கனவுத் திட்டம் என்று ஏதாவது இருக்குமானால் அது சேதுக்கால்வாய்த் திட்டம்தான் நூற்று அறுபது ஆண்டுகளுக்கும் மேலாக எத்தனை முயற்சிகள்? சுதந்திரம் பெறுவதற்கு முன்னால்  ஒன்பது கமிட்டிகள்.  பெற்ற பின்பு ஐந்து கமிட்டிகள்.

அத்தனை கமிட்டிகளிலும் நிலவழிக் கால்வாய், சுற்றுச் சூழல் பாதிப்பு , மீனவர் நலன் , பொருளாதார மேம்பாடு , லாப வாய்ப்புகள், வேலை வாய்ப்புகள் , மாற்று வழிப் பாதைகள் , என்று எல்லா அம்சங்களையும் அலசி ஆராய்ந்து முடிவுகளை தெரிவித்து இருக்கிறார்கள்.

இரண்டாயிரத்து ஐந்தில் பிரதமர் தொடங்கி வைத்த பிறகு எண்ணூற்று ஐம்பது கோடி செலவழித்து விட்டாகிவிட்டது.  அதுவரை இலங்கை அரசும் கொழும்புவின் கப்பல் முதலாளி களும் மட்டுமே எதிர்த்து வந்த இந்த திட்டத்திற்கு இந்தியாவில் முதல் எதிர்ப்பை துவங்கியவர் சுப்பிரமணிய சாமி . அவர்தான் முதன் முதலாக இரண்டாயிரத்து ஒன்பதில்  உச்ச நீதி மன்றத்தில் ராமர் பாலத்தை சேதப் படுத்தி கால்வாய் திட்டம் அமுல் படுத்த கூடாது என்று வாதிட்டார். கொழும்பின் பண முதலைகள் சேதுத் திட்டத்தை முறியடிக்க இந்தியாவில் ஆதரவு திரட்டுகிறார்கள் என்று பேட்டி கொடுத்தவரும் இவர்தான்.

அதுவரை தமிழகத்தில் தி மு க , அ இ அ தி மு க, காங்கிரஸ், பா ஜ க , இடதுசாரிகள் என்று எல்லா கட்சிகளும் தங்கள் செயற்குழு பொதுக்குழு கூடினால் சேது சமுத்ர திட்டத்தை நிறைவேற்ற கோரி தீர்மானம் நிறைவேற்றாமல் இருக்க மாட்டார்கள்.

சு சாமியின் குரலை பா ஜ க சுவீகரித்துக் கொண்டது.   திடீர் பல்டி அடித்து அதுவரை கொண்டிருந்த நிலைப்பாட்டிற்கு மாறாக ராமர் பாலம் சேதப் படுத்தக் கூடாது ,திட்டமே கூடாது என்று குரல் கொடுக்க தொடங்கினார்கள்.

தமிழகத்தில் வேரூன்றாத நிலையில் இந்தியாவின் பிற மாநிலங்களில் அரசியல் செய்ய சரியான ஆயுதம் கிடைத்து விட்டதாக அந்தக் கட்சி சேதுவைக் காப்போம் என்று குரல் கொடுக்க தொடங்கி விட்டது.   அதன் தமிழ் மாநில கிளைக்கு தலைமையை எதிர்த்து மாநில உரிமைகளுக்கு குரல் கொடுக்கும் தைரியம் கிடையாது.

ராமர் பாலம் என்றதும் முதல்வர்  ஜெயலலிதாவும் சு சாமியின் வழியில் செல்ல தயாரானார்.   விளைவு உச்ச நீதி மன்றத்தில் மாநில அரசு திட்டமே வேண்டாம் என்று அவிடவிட்டு தாக்கல் செய்தது.     இந்தியாவிலேயே தன் மாநிலத்திற்கு கிடைக்க இருக்கும் மத்திய அரசின் திட்டத்தை வேண்டாம் என்று மறுத்த ஒரே முதல்வர் ஜெயலலிதாதான். 

திடீர் என்று மீனவர்களின் நலன் பாதிக்கப் படும் என்று குரல்கள் ஒலிக்க ஆரம்பித்தன.   மாநில அரசின் பின்புலம் இருப்பதாக கேள்விகள் !

அதுவும் தி மு க தலைவர் கலைஞர் சேதுத்திட்டத்தை நிறைவேற்ற மாநிலம் முழுதும் ஆர்ப்பாட்டங்களை அறிவித்ததும் தூண்டி விடப் பட்ட மீனவர் அமைப்புகளின் பேரால் சுவரொட்டிகள் வெளிவந்தன.

முதலில் அது ராமர் பாலமா ஆதாம் பாலமா என்பதே முடிவு செய்யப் படவில்லை தனுஷ்கோடி பக்கம் ஒன்றும் கோடியக்கரை பக்கம் ஒன்றும் என்று இரண்டு மணல் திட்டுகள் இருக்கின்றன. இவற்றில் எனது ராமர் பாலம் ? முக்கியமாக மணல் திட்டுகளை முழுவதுமாக யாரும் அழிக்கப் போவதில்லை.   முப்பது மீட்டர் அகலம் உள்ள பகுதி மட்டுமே அதுவும் குறிப்பிட்ட நீளத்திற்கு மட்டுமே திட்டுப்பகுதி பயன்படுத்தப் பட உள்ளது.

அதனால் பக்தர்கள் எவரும் மற்ற மணல் திட்டுப் பகுதியை பாலமாக பாவித்து வணங்குவதை யாரும் தடுக்கப் போவதில்லை.

மத்திய அரசின் கொள்கை முடிவை உச்ச நீதி மன்றம் அமுல் படுத்த தேவையான உத்தரவை பிறப்பிக்கும் என்று தமிழர்கள் எதிர் பார்க்கிறார்கள். .

ராமரின் பேரைச் சொல்லி தமிழகம் வளம் பெறுவதை தடுப்பவர்களை ராமரே மன்னிக்க மாட்டார்.

திட்டத்திற்கு ராமர் பேரை வைப்பதில் கூட தனக்கு எந்த ஆட்சேபனையும் இல்லை என்றுகூட கலைஞர் அறிவித்துவிட்டார்.

திட்டத்தை நிறைவேற்றுவதில் உறுதியாக இருப்பதாக மத்திய அமைச்சர்கள் வாசனும் நாராயணசாமியும் அறிவித்து இருக்கிறார்கள்.

சிங்களர்களின் குரலை  எதிரொலிக்க தமிழகத்தில் இத்தனை பேர்களா?

நம்முடைய முதல்வரின் முன்னாள் வளர்ப்பு மகன் சுதாகரன் மீது பனிரண்டு வருடங்களாக ஹீராயின் போதைப் பொருள் வைத்திருந்த தாக வழக்கு நடப்பதும் அதன் மீதான விசாரணை ஒரு வழியாக முடிந்து தீர்ப்பு வழங்க இருப்பதும் மக்களுக்கு தெரியும்.

தெரியாத விஷயம் தீர்ப்பு சொல்லும் நேரத்தில் சொல்லக் கூடாது என்று நீதிபதிகளை மிரட்டுவது யார் என்பதுதான்?!

தீர்ப்பு சொல்லும் தேதி அன்று நீதிபதி ராமமுர்த்திக்கு அனாமதேயக் கடிதம் ஒன்று வந்ததாகவும் அவர் அதன் மீது உயர் நீதி மன்றத்துக்கு அனுப்பி  உரிய ஆலோசனை கோரியதாகவும் செய்திகள் வெளி வந்தன.  அவருக்கு என்ன ஆலோசனை தரப்பட்டது என்பது மக்களுக்கு தெரியாது.  ஆனால் அவர் பணிமாற்றம் செய்யப் பட்டது மட்டும் செய்தி வெளியானது.  வழக்கும் திரு சின்னப்பன் என்பவருக்கு மாற்றப்பட்டது.  அவருக்கும் அதே போன்று மிரட்டல் கடிதம் வந்ததாகவும்  அவரும் உயர் நீதி மன்ற அறிவுரையை கோரப் போவதாகவும் அறிவித்து வழக்கை இருபத்து ஆறாம் தேதிக்கு மாற்றியதுடன் விசாரணையை வேறு கோர்ட்டுக்கு மாற்றவும் கோரியிருக்கிறார்.

அதுவும் மிரட்டல் கடிதம் அனுப்பியது தொழில் செய்து வரும் வழக்கறிஞர் ஒருவர் என்று செய்தி வெளியாகிறது.

இப்படி எல்லாம் நடந்தால் பொது  மக்களுக்கு நீதிமன்றங்களின் மீது எப்படி நம்பிக்கை ,மதிப்பு வரும்.  எல்லாவற்றுக்கும் மேலாக காவல் துறையும் நீதிபதிகளும் இந்த வழக்கில் எப்படி நடந்து கொண்டிருக்கிறார்கள்?

மிரட்டியவர் மீது ஏன் இதுவரை நடவடிக்கை ஏதும் இல்லை?     யார் என்று ஏன் அடையாளம் காட்ட வில்லை ?   இதில் காவல் துறைக்கும் நீதிபதிகளுக்கும் பொறுப்பு ஏதும் இல்லையா?  யார் மீதும் இதுவரை முதல் தகவல் அறிக்கை பதிவானதாக தகவல் இல்லை. புகார் கொடுத்து விசாரிப்பதில் அவர்களுக்கு என்ன பிரச்சினை?  புகார் கொடுக்க வேண்டாம் என்று அதிகாரத்தில் இருப்பவர்கள் தடுத்தால் தவிர நீதிபதிகளும் காவல் துறையும் இப்படி மௌனமாக இருக்க மாட்டார்கள்.

அவரது நோக்கம் என்ன?  விடுதலை வாங்கிகொடுப்பதா? தண்டணை வாங்கி கொடுப்பதா?

பெங்களுருவில் நடக்கும் சொத்து குவிப்பு வழக்கில் தீர்ப்பு வரும் வரையில் இந்த தீர்ப்பு வரக்கூடாது என்பதற்காக இந்த மிரட்டல் என்றால் என்ன பொருள்?     விடுதலையாகி விட்டால் சுதாகரன் ஆட்சியாளர்களுக்கு எதிராக திரும்பி விடுவார் என்று எதிர் பார்கிரார்களா?  அவர் விடுதலை யாவதிலும் தண்டணை பெறுவதிலும் பொதுமக்களுக்கு எந்த கருத்தும் இல்லை. ஆனால் ஒரு கிரிமினல் வழக்கில் தீர்ப்பு சொல்லப் படும் நேரத்தில் யாரோ ஒருவர் தலையிட்டு தீர்ப்பை நிறுத்த முடியும் என்பது மிகவும் கவலையளிக்க கூடியது.    ஆளும் கட்சியின் தலையீடு ஏதும் இல்லை என்பதை நிரூபிக்க வாவது மிரட்டியவர்கள் மீது உடனடி நடவடிக்கை வேண்டும்.   இல்லையென்றால் இதற்கெல்லாம் ஆளும் கட்சியே பொறுப்பு என்று மக்கள் மன்றம் தீர்ப்பளித்து விடும்.