பொதுமேடை

மயிலாப்பூரில் திருவள்ளுவருக்கு 1935ல் கோவில் உருவானதாக அங்கிருக்கும் கல்வெட்டு சொல்கிறது.

27/04/1973ல் முதல் அமைச்சர் கருணாநிதி கோவில் திருப்பணியை தொடங்கி வைத்திருக்கிறார். நெடுஞ்செழியன், கண்ணப்பன் ஆகியோர் முன்னிலை வகிக்க குன்றக்குடி அடிகள் தலைமையில் திருப்பணி குழுவும் அமைக்கப்பட்டிருக்கிறது.

இதெல்லாம் கல்வெட்டு விபரங்கள்.

திருவள்ளுவர்-வாசுகி சிலைகள் இருந்தாலும் கூடவே ஏகாம்பரேசுவரர் உடனுறை காமாட்சி அம்மன் கருமாரி அம்மன், நவக்ரகம், சனீஸ்வரர் சந்நிதிகளும் இருக்கின்றன.

இந்து சமய அறநிலைய துறையின் கட்டுப்பாட்டில் இருக்கும் அந்த கோவிலுக்கு குருக்கள் நியமிக்கப்பட்டு பூஜைகள் நடத்தப்பட்டு வருகின்றன.

இதில் தெரியும் உண்மை என்ன?

கலைஞர் ஏமாந்தாரா? வள்ளுவரை இந்து என்று ஒப்புக் கொண்டாரா?

வள்ளுவரை யார் எப்படி போற்றினாலும் திருக்குறளை யாரும் மாற்ற முடியாதல்லவா?

உலகப் பொதுமறை என்று எல்லாரும் ஒப்புக் கொள்ளும் திருக்குறள் எல்லா மதத்தினருக்கும் பொதுவானது.

வள்ளுவம் பார்ப்பனீயத்திற்கு எதிரானது என்பதால் அதை கபளீகரம் செய்ய பார்பனீயம் செய்யும் முயற்சிகளில் ஒன்றுதான் இந்த கோவில் விவகாரமும்.

எதை பார்ப்பனீயம் விழுங்கவில்லை.?

உலகம் முழுதும் பரவியிருக்கும் பௌத்தம், தான் பிறந்த இந்தியாவில் செல்வாக்கற்றுப் போனதற்கு பார்ப்பனீயம் செய்த தந்திரங்கள்தான் காரணம்.

பார்ப்பநீயத்திற்கு இரையான மதங்கள் ஜைனம், சீக்கியம் என்றும் சொல்லலாம்.    தன்னை ஏற்றுக் கொள்ளாத தத்துவத்தை உறவாடி அழிப்பதே பார்ப்பனீயத்தின் இயல்பு.

அந்த வகையில் உருவானதுதான் இந்த வள்ளுவர் கோவில் பிரச்னையும். தமிழர்கள் ஏற்றுக் கொண்டிருந்தால் தமிழகம்  முழுதும் வள்ளுவர் கோவில்கள் பரவி இருக்குமே? அவர்கள் உண்மை அறிவார்கள்.

பார்ப்பனர்கள் வள்ளுவரை தனதாக்கிக் கொள்ள செய்த சூழ்ச்சிகள் ஆயிரம். அவைகள் ஏன் எடுபடவில்லை என்றால் அவர்களுக்கு உண்மையில் அதில் ஈடுபாடு இல்லை. நாடகத்துக்கு ஒரு கோவில் கட்டினால் அதை உண்மையாக பரப்ப அவனுக்கு என்ன பைத்தியமா ?

அது மட்டுமல்ல. முன்னோர்களை நடுகல் நாட்டி வழிபடுவது தமிழர் மரபு. அந்த வகையில் கூட வள்ளுவருக்கு கோவில் அமைந்ததாக கொள்ளலாம். 

இந்த ஒன்றை சான்றாக காட்டி வள்ளுவரை இந்துவாக மத மாற்றம் செய்யும் சங்கப் பரிவாரங்களின் முயற்சி ஒருபோதும் வெற்றி அடையப் போவதில்லை.

திருவள்ளுவர் படத்துக்கு காவி பூசிய பாஜகவின் செயலுக்கு எல்லாத் தரப்பில் இருந்தும் கண்டனங்கள் குவிந்து வருகின்றன.

அதிமுகவின் செய்தி தொடர்பாளர் வைகைச்செல்வன் இது பற்றிய தனது கண்டனத்தை தெரிவித்த அதே வேலையில் இன்று நிருபர்களை ச்ந்தித்த அமைச்சர் பாண்டியராஜன் திருவள்ளுவர் பற்றி தனது அறியாமையை அள்ளித் தெளித்தார்.

“திருவள்ளுவர் நாத்திகராக இருக்க வாய்ப்பில்லை. அவர் எந்த சமயத்தவர் என்பதற்கும் ஆதாரம் இல்லை. அவர் சைவராக இருக்கலாம். வைணவராக இருக்கலாம். எனவே அவருக்கு திருநீறு பூசுவதில் தவறு இல்லை. விரும்பினால் கிறிஸ்தவர்கள் அவருக்கு சிலுவை கூட போட்டுக் கொள்ளட்டும்.” என்று திருவாய் மலர்ந்திருக்கிறார்.

அமைச்சர் உதகுமாரும் கூட இருக்கிறார். அவர் ஏதும் சொல்லவில்லை.

திருவ்ள்ளுவர் காலம் கிறிஸ்துவுக்கு 31 ஆண்டு முந்தையது என்று ஒப்புக் கொண்டு  தமிழக அரசு காலண்டர் வெளியிடுகிறது. அது கூடவா பாண்டியராஜனுக்கு தெரியாது.?

ஏன் இப்படி வைகைச்செல்வனும் பாண்டியராஜனும் முரண்பட்டு கருத்துக்கள் சொல்ல வேண்டும்.

ஏனென்றால் இதில் பாஜக சம்பத்தப்பட்டிருக்கிறது. அவர்களை பகைத்துக்கொள்ள பாண்டியராஜன் விரும்பவில்லை.

இனிதான் வள்ளுவர் எந்த மதம்  என்று ஆராய வேண்டும் என்கிறார் பாண்டியராஜன்.

இப்போதுதான் கீழடி அகழ்வாராய்ச்சி தொடர்பாக நிதி ஒதுக்கி அருங்காட்சியகம் அமைக்க ஏற்பாடு செய்த வகையில் கொஞ்சம் நல்ல பெயர் எடுத்திருந்தார் பாண்டியராஜன். அதற்குள் ஏன் இப்படி கெடுத்துக் கொள்ள வேண்டும்?

பழைய பாசத்தை எல்லாம் பாண்டியராஜன் விட்டு விட வேண்டும்.

வள்ளுவருக்கு காவி பூசிய களவாணிகள் தண்டிக்கப்பட வேண்டும்?

திருவள்ளுவர் தந்த திருக்குறள் உலகப் பொதுமறையாக கொண்டாடப்படுகிறது.

எம்மதமும் சாராத இறைக்கொள்கையே வள்ளுவம்.

இதில் இதுவரை எந்த குழப்பமும் ஏற்பட்டதில்லை.

ஆனால் பார்ப்பனர்கள் சிலர் வள்ளுவர் அந்தணர் மரபில் வந்தவர் என்று கட்டுக் கதைகளை பரப்ப முயன்றனர். எடுபடாத முயற்சியாகி விட்டது. இன்று பிரதமர் மோடி வள்ளுவரை புகழ்கிறார். திருக்குறளை மேற்கோள் காட்டுகிறார். ஏன் என்று எங்களுக்கு தெரியாதா?

உண்மையையும் உள்நோக்கத்தையும் பாகுபடுத்தி பார்க்கத் தெரியாதவர்களா தமிழர்கள்.

தாய்லாந்து சென்று அங்கு திருக்குறளின் தாய் மொழி ஆக்கத்தை வெளியிட்டு பெருமை சேர்த்திருக்கிறார் பிரதமர் மோடி.

அதைப் பாராட்ட முனைவதற்குள் இங்குள்ள பாஜகவினர் தங்கள் வலை தளத்தில் திருவள்ளுவருக்கு காவி உடை போட்டு நெற்றியிலும் கையிலும் திருநீறு பூசி அவரை சைவ சமயத்தை சார்ந்தவர் போல சித்தரிக்க முற்பட்டிருப்பது கடைந்தெடுத்த ஏமாற்று வேலை.

திருவள்ளுவரை அவமதித்திருக்கிறார்கள். குற்றம் இழைத்திருக்கிறார்கள். நீதிமன்றம் தலையிட்டு நீதி வழங்க வேண்டும் என்ற குரல் ஓங்கி ஒலிக்கட்டும்.

பொறுப்புள்ளவர்களாக இருந்தால் அவர்களாகவே முன்வந்து இந்த தவறான படத்தை உடனே நீக்க வேண்டும்.

இதையெல்லாம் பார்த்துக் கொண்டு சும்மா இருக்கிறதே மாநில அரசு ?

பல கட்சிகளும் இந்த செயலை கண்டித்து அறிக்கை விடுத்திருக்கிறார்கள். அரசு விழித்துக் கொள்ளுமா?

வெந்த புண்ணில் வேல பாய்ச்சுவதுபோல் சனாதன தர்மத்தை தான் வள்ளுவர் அறம் பொருள் இன்பம் என்று எழுதியிருக்கிறார் என்று ஒருவர் விளக்கம் சொல்கிறார்.

கடவுள் வாழ்த்தில் வள்ளுவர் சொன்ன ‘வாலறிவன் நற்றாள்‘ சொல்லாடலை சுட்டிக்  காட்டி பாஜக வாதிடுகிறது.

முக ஸ்டாலின் யாகாவாரினும் நாகாக்க குறளை பிழையில்ல்மல் சொல்லி விட்டால் மேற்படி பதிவை நீக்கி விடுகிறோம் என்று பாஜக டிவிட்டர் கூறுகிறது. ஸ்டாலினுக்கும் உங்களுக்கும் உள்ள பிரச்னையை தீர்க்க திருவள்ளுவர் ஏன் பந்தாடப்பட வேண்டும்?

வள்ளுவர் நாத்திகர் என்று எப்போது யார் சொன்னார்கள்? பார்ப்பனீயத்தை ஏற்றுக் கொள்ளாத ஓரிறை கோட்பாட்டை வள்ளுவம் ஏற்றுக் கொள்கிறது.

பிறப்பொக்கும் எல்லா உயிர்க்கும் என்ற வள்ளுவம் எப்படி பிறப்பின் அடிப்படையில் பேதம் கற்பிக்கும் சனாதனத்தை ஏற்றுக் கொள்ளும்.?