தலைவர்கள் இல்லாமல் தள்ளாடும் காங்கிரஸ்??!!

பதினெட்டு மாதங்கள் காங்கிரஸ் தலைவராக இருந்து பாராளுமன்ற தேர்தலை முன்னின்று நடத்திய ராகுல் காந்தி, அமேதியில் தோற்று முன் எச்சரிக்கையாக நின்ற வயநாட்டில் வென்று தன் தலையை காப்பாற்றிக் கொண்டு கட்சியை வெற்றி பெற வைக்கும் முயற்சியில் தோற்று விட்டார்.

அத்துடன் காங்கிரஸ் தலைவர் பதவியையும் ராஜினாமா செய்தார்.

காங்கிரஸ் தலைவர்கள் கூடி கூடிப் பேசியும் வேறு ஒருவரை தலைவராக தேர்ந்து எடுக்க தடுமாறி கடைசியில் மீண்டும் சோனியாவை தற்காலிகமாக தலைவராக தேர்ந்து எடுத்து இருக்கிறார்கள்.

ஒருவழியாக காங்கிரஸ் இல்லாத பாரதத்தை உருவாக்குவோம் என்ற பாஜகவின் முழக்கம் வெற்றி பெற்றுவிட்டதா?

பிரியங்கா காந்தியை முயற்சித்துப் பார்த்து அதிலும் வெற்றி கிடைக்கவில்லை. ஆனாலும் அவரை முன்னிலைபடுத்தியே வருகிறது காங்கிரஸ்.

தேசிய அளவில் செல்வாக்கு படைத்த தலைவர்கள் காங்கிரசில் அருகி விட்டனர்.

மத சார்பின்மை, சோசியலிசம், மாநில உரிமைகள் பாதுகாப்பு போன்றவற்றில் காங்கிரசிற்கு இருக்கும் கொள்கைப்பிடிப்பு வேறு எந்த அகில இந்திய கட்சிக்கும் இல்லை. எனவே காங்கிரசின் வீழ்ச்சி முற்போக்கு சக்திகளின் வீழ்ச்சியாகதான் பார்க்க வேண்டும்.

இது எல்லாவற்றையும் முடக்கப் பார்க்கும் இயக்கம் பாஜக. அநேகமாக பாஜகவுக்கு சவால் விடும் அகில இந்திய எதிர்கட்சிகள் இல்லை என்ற தோற்றத்தை சமீப காலமாக அது ஏற்படுத்தி வருகிறது. அது நாட்டுக்கு நல்லதல்ல.

காங்கிரசின் வீழ்ச்சி முற்போக்கு சக்திகளுக்கு பின்னடைவுதான்.